Búgin QR Prezıdenti janyndaǵy Ortalyq komýnıkasıalar qyzmetinde ótken brıfıń barysynda Parlament Májilisiniń depýtaty Qýanysh Sultanov Qazaqstannyń memlekettiligine qatysty aıtylyp júrgen áńgimege óz pikirin aıtty. Bul týraly QazAqparat jazdy.

Depýtat: «Shyndyǵynda Qazaqstan Táýelsizdik alǵan kúnnen bastap, sol táýelsizdikke dál bizdeı qýanǵan eshkim bolǵan emes. Bizdiń halyq óz aldymyzǵa egemen el boldyq dep qýanyp jatsaq, syrttaǵy jurt «bular el bola ma, bolmaı ma» dep baqylaı qarap, neshe túrli qaq-soq áńgimelerdi araǵa taratty. Súıtip, egemendiktiń áýel basynan aıtylǵan áńgimeler áli de jalǵasyp keledi. Syrttaǵy túrli sandyraq áńgimeniń artyna ilesip ketpeýmiz úshin ózimizdiń ishki ulttyq tutastyǵymyz myǵym bolýy kerek. Al bizdiń ishimizde ondaı áńgime joq, oǵan jol berilmeıdi de. Jalpy, «qazaqtarda memleket bolmaǵan, olarda shekara bolmaǵan» degen áńgime beker. Kerek deseńiz arǵy ǵundardan, bergi Qazaq handyǵynan bastap, bizde shekara shartty túrde qashanda bolyp keldi. Alaıda,  ondaı shekaranyń kúshi qaı ýaqytta bolady? Onyń kúshi shektesetin kórshi memleketpen kelisimge kelgende jáne ol kelisimder BUU-da bekitilgende, shekara shartty emes zańdy bolady. Iaǵnı, Qazaqstanda buǵan deıin shekara boldy, biraq kelisim bolǵan joq.  Máselen, 1884 jyly Reseı men Qytaı arasynda shekara syzyǵy ózara júrgizildi, oǵan Qazaqstan qatyspady. Nege? Óıtkeni, bizdiń memlekettigimiz bolmady, Reseıdiń quramynda boldyq. Sondyqtan da, memleket bolý biz úshin bárinen qymbat, memlekettilikti kózdiń qarashyǵyndaı saqtaýymyz kerek. Qazaq memleketi alyp kerýen bolyp óz jolymen júrip keledi, óz dańǵylyn salyp keledi. Máńgilik el degen maqsat jolyna túsken kerýenbiz», - dep bildirdi óz pikirin.

Qamshy-aqparat